1
BIJLAGE.
MAURITS GEBOOREN PRINCE VAN ORANGE,
Enz.
Eedele erntfeste wijse voorsienige ende discrete be-
sundere goede vrunden,
Voor ons leste vertreck vuyten Hage hadden wij
verscheyden advysen gecregen, dat den viant eenen
aenslach voor hebben(de) was op ten Hage over zee ende
hoewel wij den zelven aenslach voor den viant nyet
zonder merckelicken difficulteyten en bevonden, nochtans
omme die occasie tot sulcken voornemen eensdeels wech
te nemen, was bij ons goet gevonden twee compaignien
ruyteren en(de) een compaignie voetknechten in garnisoen
te ordonneren zoo tot Delff als in den Hage, maer over
mits wij verstonden dat tzelve te continueren tot groote
bezwaernisse van den staet van den lande soude strecken
ende nochtans geen genouchsame verseeckeringe geven,
soo hadden wij zelffs eerst die situatie van (den) Hage
bezichticht en(de) daer op rijpelick geleth hebben(de) daer
nae gelast, dat bij verscheyden ingenieurs va(n) gelijcken
zouden werden gedaen omme te letten off mit wercken
van fortificae(tie) den Hage in redelicke verseeckeringe
mochte worden gestelt, opdat bij den borgers en(de)
inwoonders selffs in alle occurrentien ende jegens tamelick
gewelt bewaert mochten worden buyten der landen costen
ende den viant zulcke ende gelijcke aenslagen, die hij
op ten Hage tot disreputae(tie) ende ondienste van den
lande ende ruine van den Hage ende ommeleggende
dorpen souden mogen vooren hebben geheel vuyten
2