BIJLAGE Q.
Hof 4592.
29 November 1575.
J. VAN HOUT.
Dye copie uytgegeven huyden den 19 January anno 1576 bij mij
Alsoe men daegelicxs bevindt, dat den viandt hem sonder eenighe
vreese onthout in (de) dorpen tusschen Haerlem ende Den Haege
gelegen ende deurdien die passagie alhier onveylich gehouden werde
niet alleen voor die ingesetenen van Leyden, mer voor allen anderen
passerende luyden ende dat de viandt onder dexsel van zeeckere
sauvegaerde, die bij eenige dorpen, den viandt als t schijnt toegedaen
zijnde, vercregen is, oock gepoocht hebben hem te vinden in zeeckere
plaetzen in t Westquartier gelegen ende dat deselve sauvegaerde,
sulcx die vercregen is, bevonden wert t gemeen best te bejegenen
ende daeromme niet langer geleden en behoort te werden, soe est,
dat die van de gerechte deser stede duer expresse last van de Ge
committeerden van Sijne Excellencie ende Staten s landts van Hollant
verwittigen, insinueren ende laeten weeten bij desen allen ende eenen
ygelicken, van wat qualiteyt, conditie ofte state hij sij, dat de sauve
gaerde voorseyt te niet es gedaen ende advertere daeromme oock
allen huysluyden bij desen, dat zij heuren goeden sullen brengen
ofte doen brengen binnen drie daegen eerstcomende binnen deser stede
ofte andere plaetsen, Zijner Exc(ellen)cie toegedaen, aldaer zij deselve
sullen willen betrouwen.
